للشلل يالايدي اللي طعنها جاء في ظهرها
من يبور بموطنه ربي عن الدنيا يزيله
زمرة الارهاب بعد ابليس باوهامه زغرها
استباحت للدما واستخدمت عشرين حيله
زمرة غرّر بها واليوم شاهدنا غررها
فجّروا في دارهم واسبابها المخ وغسيله
ماتشوف ابصارهم للدرب معميها قترها
الغشاوة ضيعت درب الهدى وأخفت دليله
ياوطنا ماعليك من الفتن واللي بذرها
نام بأمان الولي تحرسك عينه كل ليله
نام والزمره يجي يومٍ وتعلن به صورها
نايف الأمن ورجاله يدركون المستحيله
ياوطنا فيك ميزاتٍ ولا واحد حصرها
من يحاول حصرها يرجع وتقفاه الفشيله
فيك تطبيق الشريعة غيرنا من هو قدرها
ميزةٍ تبقى لنا بين الدول ميزه جليله
كم وكم شعبٍ تمنى انه سعودي لجل يرهى
بالامان وكل خير مايدوّر عن بديله
نحمد الله كلما نذكر ذرى الدار وفخرها
الفهد واخوانه الاخيار حامين الدبيله
عزنا اللي كلما الحرب الضروس ابدت خطرها
جنّبونا بامر ربي شرها باهون وسيله
جامعين الدين والحكمه وبعدٍ في نظرها
يالله انك ترحم اللي جابهم زيزوم جيله
فضل ابو تركي عظيم وسيرته كلٍ شكرها
اسس الديره وصارت من فضيله في فضيله
وارجع اقول ان الارهاب العصا لا ما شقرها
المواطن والقياده صف ما يوجد مثيله
يا وطنا لاتزعزع زمرة جاها قشرها
ياوطن ناد المواطن للمهمات الثقيله
ياوطن وابشر باواليد يشجعها ظفرها
سرية عيالٍ يمانيهم على الجزله طويله
سريةٍ للحرب يدفع روسهم زايد صطرها
كل واحد يستميت ليا ذكر ذيك الظليله
شجرةٍ تظللوا فيها وشبعوا من ثمرها
كيف مايجزوا جمايلها الكثيره بالجميله
شجرةٍ لو كل واحد لجلها روحه نذرها
يعتبر تقديم روحه للوطن حاجه قليله
وللشلل يالايدي اللي تغدر وتطعن ظهرها
من يبور بموطنه ربي عن الدنيا يزيله
