الحمد لله ديرتي مابها باس
ماهزها التفجير والا ثناها
الله يزيل اللي مع الشر له راس
عساه يمحى من حياة حياها
المجرمين اللي عديمين الاحساس
ما فكروا بافعالهم وش مداها
زمره خدعها ابليس وابليس خناس
اعمى بصيرتها وكدر صفاها
طريقهم في الآخرة درب الاعماس
في النار تصلاها وهذا جزاها
ديرة ملوك ما تتقى عن الباس
قواتها من دونها من وراها
من دونها جيش عدد رمل الاطعاس
موت الشرف من دونها مبتغاها
ديرة أمان وربعها خير الاجناس
ديرة أبو فيصل بحكمة رعاها
شيخ حكيم الراي لطيب نبراس
دار السعود اللي يذكر نباها
ربي عليها اسمه ولا ضرها خاس
الله يحفظها ويحفظ ثراها
ديرة معزي شيخها شيد الساس
على العدل والدين من يوم جاها
شيخ على العدوان واهل الغدر داس
سم على اللي من اهباله نواها
دار السلام وعطرها ريح الانفاس
كل يوقف دونها من غلاها
توفي ولا تظلم ولا حاربت ناس
تفخر بها جيرانها من وفاها
تعطي ولا تاخذ بلا حد وقياس
أعمالها بالخير تدفع بلاها
بين الديار الهاي هي درة الماس
يبشر بعلم الخير من هو نصاها
ديره عظيمة حبها يرفع الراس
أحبها من قلب ما اعشق سواها
الله ينصرها على كيد الابلاس
واللي نواها بشر جعله فداها
