البارحة يوم القمر صار بدرا
يوم إن خال القلب نام بسريره
وسرى بي الهاجوس في ليل غدرا
أمشي على نور البصر والبصيره
جيت الديار ودرت في كل صحرا
ودشيت غباة البحور الغزيرة
ابحث بواقع وقتنا ويش يجرا
وين الفكر ياهل العقول الكبيره
وين العلوم ألي بالاوراق نقرا
ألي من الخلاق جتنا بريره
راحت هباء عبر الارياح تذرا
وهبت هبوب الجهل في كل ديره
الدين بسمه تزهق أرواح غدرا
وشلون بسم الدين تؤتى الكبيره
فيها الضماير من هل الشر تشرا
لا جارك الله يا مبيع ضميره
خسران في دنياك وايضا فالخرا
طاوعت عدوانك وبعت العشيره
أغراك منهو بالمواعيد مغرا
يطعمك من شره ويحرمك خيره
هاذي رياض المجد ماهيب تعرا
حن درعها عنها نرد المغيره
لاجاء نهار فيه كسر وجبرا
عدونا تربط عليه الجبيره
صويبنا لاطاح ماهوب يبرا
كم عشير نفرقه من عشيره
حكامنا بالخير والشر تدرا
نظراتهم ماهيب مثلك قصيره
حكامنا للدين فارس وسبرا
دستورهم قرآن ما فيه غيره
فيهم ورع فيهم مروفه وصبرا
وفيهم لمن ضاموه الأخصام جيره
فيهم كرم فيهم شهامة وجبرا
ليا جالهم ألي يشتكي من الكسيره
كم واحد أيسر بهم عقب عسرا
من مدهم يمناه مدت لغيره
وصلاة ربي عد ما هل قطرا
على بشير الله محمد نذيره
