عذب القوافي يا بوفيصل تماري بك
ولا ننظم بوصف طيبك غير أطايبها
مولاي.. وان طاب شعري فيك من طيبك
وإنت الذي لا وطيت ارضٍ تطيبها
الله يمتّع بك ... ويحييك.. ويثيبك
والله يعديك بالدنيا نوايبها
عمّ البلاد السعودية خبر طيبك
فرح.. بسلامة وطيب أغلى حبايبها
طهور ما صابك.. وما كان بيصيبك
وتزول آلامك وتبرى سبايبها
يا ماسحٍ دمعة الأيتام من جيبك
الناس تدعي من أصغرها.. لشايبها
من جيت للدار هذي هي تهلّي بك
غيث الوسم ما توقف من سحايبها
ما فاق ترحيبنا بك ربع ترحيبك
بالناس .. إلى جتك تشكي لك مصايبها
نفداك يا شيخٍ.. ونلبي مطاليبك
الكل روحه على كفيه جايبها
لين قبست قمة الشدات كني بك
ماترقد إلا أنته مطفي لهايبها
في شدة الباس ماضيةٍ تجاريبك
بالحزم والحكمة تخلص نشايبها
يا سقم عدوانك.. ويا سعد أصاحيبك
تدعي لك الناس حاضرها وغايبها
بالجود والبذل كل الناس تدري بك
يمناك وسميةٍ تنثر وهايبها
الناس بالشرق وإلا الغرب تحكي بك
خيرك مثل ممطر الخيرات صايبها
عمّ البلاد السعودية خبر طيبك
عيد.. بسلامة وطيب اغلى حبايبها
