وقفت الموقف اللي واجبه ما يقبل التأخير
وأنا صابر على شأنك إلى سبعة عشر شعبان
سلمت ودمت يا من له نكن الحب والتقدير
عسى ربي يديمك يا حبيب الجيش يا سلطان
وجودك يجعل الشاعر يجود ويحسن التعبير
مدامك تستمع له تنفتح لإبداعه البيبان
وأنا ما نيب مفتي عام جيش المملكة يا أمير
أنا جندي من جنود الوطن وسلاحي الإيمان
درست الفقه والتوحيد والقرآن والتفسير
وكتب المكتبات اللي كتب فيها عن القرآن
ولا والله لقيت الكلمة اللي تدعم التفجير
وقتل الأبرياء والزج بالأطفال والنسوان
أنا يا أمير مسلم منهجي ما يقبل التغيير
ولا لي دين ثاني يقبل الإرهاب والعدوان
أنا ثابت عقيدة مالتفت للكذب والتزوير
ولا تغريني الفتنة ولا تجذبني الألوان
أنا جندي سعودي مسلم وطبعي أحب الخير
واتعذب إلى مني شبعت وشفت أحد جوعان
لي أخوان بفلسطين وجنوب أفريقيا وكشمير
ولي بأسبانيا وألمانيا والهند واليابان
صحيح أنا بعيد ونختلف باللبس والتصوير
ولكنا مثل وضع الجسد وقت اللزوم اخوان
تربينا على سيرة بلال ومصعب بن عمير
وأبو بكر وعمر وأبو الحسين وخالد وعثمان
ابتألم مادام المسجد الأقصى يبي تحرير
وابغضب كل ما شفت المدافع تقصف الشيشان
أنا مكة وأنا طيبة وأنا عرعر وأنا الخرخير
وأنا جدة وأنا حايل وأنا بيشة وأنا نجران
ابحمي كل شبر بديرتي واللي يصير يصير
وابطلع للمآذن وارتفع وارفع بها الأذان
تطورنا على أيديكم وحافظنا على التطوير
وقدمنا لكم طاعتنا اللي تنبذ العصيان
ولا نقبل فتاوى أي شخص ولا لها تأثير
إذا ما هي فتاوى من هنا من منبع الإيمان
وترى بعض اجتهاد الأمة يسبب لها التأخير
مثل ما الزود في بعض المسائل يعتبر نقصان
وردي العقل مهما تحذره ما ينفع التحذير
لأن العقل للمجنون مثل الشوف للعميان
شف آثار الدمار اللي جنا الإرهاب والتدمير
وشف باليوم كم يذبح وكم ينزح من الأفغان
حدث ما كان له داعي وغلطة مالها تبرير
وشف والله واعلم كم نبي ندفع من الأثمان
اجل وشلون غلطة منتحر يدفع ثمنها الغير
مثل حرب الخليج اللي طلع كل بها خسران
