علم يحرم الجفن لذة رقاده
صجت ولجت فيه الأخبار تنبيه
خيم على شرق الرياض بسواده
جابه يشيله مجرم في مخابيه
غرر وزول له طريق السعادة
على هلاكه يشعبنه خطاويه
يدور الجنة ويبغى الشهادة
أخطا من الثنتين والنار قافيه
فجر بنفسه لين راحت رماده
من انفجاره فجر اللي حواليه
هز الرياض بهزةٍ وارتعاده
من الرعد قامت تصافق مبانيه
لو هزها ما هز روس القيادة
حكامنا ستر الوطن عن بلاويه
حكمٍ على السنة بدا واستناده
يسند على ما نزل الله معانيه
أسيادنا نعم بهاك السياده
اللي تمد الخير دايم وتعطيه
من يستبيح حدود حرمة بلاده
الله وأنا ساله عن الكون يخفيه
اللي على الإرهاب يصهل جواده
منه يتبرا الدين والخير مخطيه
اللي يزيد الشر جمر ووقاده
مرهب ولا له غير الإرهاب أسميه
لو يدعي بالدين وأعلن جهاده
الدين لحقه منه جرم وتشويه
من يمتلي قلبه بشر وحقاده
يلقا عليه ابليس دربٍ ويغويه
حصل بدنياه الدعا والنقاده
خسر حياته بأوله ثم تاليه
ما كل مجهد صايب باجتهاده
اللي معه عقلٍ يجود مباديه
يدور اللي فيه صالح وفاده
ماله لزوم بكل سوٍ وطاريه
اللي يدور طاعة الله عباده
إلى لقا شرٍ يحاول يطفيه
وعداد ما ذعذع سموم وبراده
صلاة ربي في جوابي وتاليه
على النبي اللي نقي فؤاده
قد الطريق وعقبه الناس تمشيه
