الحمد للي ما على قدرته كود
عون العباد مهونٍ كل كايد
يعطي على شكر النعم والثنا زود
وإذا عطا ماهوب يعطي زهايد
بابه عن المضطر ماهوب مردود
إللي يعرفه بالرخا والشدايد
حبل الرجا به دايم الدوم ممدود
يطفي بكيدي حاميات الوقايد
أنا سجينه حزن والقلب ملهود
وجروح روحي موجعات وجدايد
على فقيد الخير والطيب والجود
والعزو الفزعه وخير العوايد
الناس وأفعاله على طيبه شهود
وطبايع محمد بجيله فرايد
بره وجوده ما لها قدر وحدود
ومن عاشره ما نال غير الفوايد
وشلون ومحمد عن الكبد مقدود
أقوى العزا ودموع عيني بدايد
لعل قبره نور أنهار وورود
ويجزاه بالجنة صدوق الوعايد
أخوي ماهوب أي غايب ومفقود
موته غدر وإرهاب غل ومكايد
من شرذمة فكرٍ عن النور مسدود
ناسٍ عن اليمه وأهلها تحايد
أغواهم الشيطان عن خير مقصود
سودٍ على نور الشريعة تزايد
وحنا بعز وخير وسهود ومهود
في ظل حكم لأبلج الدرب قايد
والله يعين اللي غدا عنه مغرود
أبوي تاج الطيب بين البدايد
ويجبر عزا أم اللي غدا في ثرى العود
يا كبر فجعة قلبها واللهايد
ويجبر عزا من شفها عنه مردود
نوف اللي أثر دمعها بالوسايد
ويصلح (ليان ولين) ويهون الكود
بامره وينصرنا على كل كايد
