عسى السحاب يرشها صبح وعصير
وديّم مزونه من على ديرة الجوف
منه هدير السيل لصوته نواعير
يغسل وطاها غسل وتسمع له دفوف
ياالله بديميه تسوق التباشير
والعقربي بأطرافها يجهر الشوف
عشرين ليله والبرد له زوابير
فوق التلال وكل وادي وقفقوف
من عقبها تربع وتزهر نواوير
ويلبس حماد الجوف من كل نفنوف
دارن به رجال الكرم والمناعير
كرام اللحا صيته مع الناس معروف
ماصكوا البيبان فتحة على الصير
وكلن يهلي يحتري جية ضيوف
ونجر المعزب يقعد النيم ويشير
مسيارك لشبّابة النار مخلوف
الكل منهم له مناخة مسايير
يسبقك ريح الهيل لا جيت ملهوف
ما تقدع إلاّ حلوة الجوف تقدير
ولا نقلط الا فطِّر الشيب وصنوف
على صواني مقلطه ما كما الخير
لا فك قصدير المفاطيح مكلوف
ادليت وحبالي على جمة البير
آرد قراحه ما الحق النفس بحسوف
بعض السوالف مثل نقد الدنانير
عجنت بمعجون الذهب ما له وصوف
وادي النفاخ اسمه ولا احتاج تفسير
الجوف واهل الجوف تشهد له الوف
من شرب من ماها جلس مااكمل السير
يغريه ماها واهلها وكل ما آلوف
لا قلت جوفي افتخر بالمشاهير
ربعي هل الطولات والعز والنوف
العلم غانم والمساعي مصادير
مجالسن تعمر به جلوس ووقوف
خصيت وباقي الناس من دون تقصير
جاله مجال وكل موقف له ظروف
ارضه حماره مثل خد الغنادير
نور الشمال الجوف ولا توفي حروف
عيونه عشقته والنخل والمواطير
وحصنه واهلها وكل ما به من جروف
امشرعه بابه عليها طوابير
رجاله رجال وفعلها سلة سيوف
لا قيل مسرف قلت من دون تفكير
وشلون ما اغلي الجوف وهو قطعة الجوف
