سورك قلوب ورجال ومنايا
يا وطن ما تهون ولا نهون
نبت رملك على صدور وحنايا
وارخصك صار يسكن فالعيون
ما نجامل ولا نقبل وصايا
يا الرياض الحبيبه والحنون
كدروا ليلك خباث النوايا
وانتي الناس بارضك يامنون
مجدك يلوح في كل الزوايا
واهلك اللي لعينك يرخصون
كلنا لك من آخرنا فدايا
اقطع الشك يا شين الظنون
كل ما نملك ونقدر هدايا
غالي العمر والمال وبنون
يشهد الله وعقال البرايا
انهم فالمواجه يعجزون
الخفافيش تمشي بالخفايا
يقتلون النساء ويروعون
لو عليهم من المله سمايا
دينهم كذب هاللي يدعون
والله ان الثقيل من الرزايا
كنه بشوتنا فوق المتون
نردع الشر وان جت للحمايا
اصغر عيالنا قال يخسون
يظهر الحق وتبين الخطايا
وينكشف كل كذب وكل دون
رفعت الدين ما هي بالحكايا
نعرف الحق وانتم تجهلون
سورك قلوب ورجال ومنايا
يا وطن.. ما تهون ولا نهون
