أنا والليل والنجمة .. وهاجوس وهم وضيق
أقاسيها .. وأنا في حلم لا نايم ولا صاحي
أفكر وتخيل .. لين .. حتى ما بقي بي .. ريق
ودمي نشف من زود القلق .. قطعت مسباحي!!
سبايب من تعلق فيه .. قلبي بالهوى تعليق
نزل قدره من أسلوبه .. وعياء الحب ما طاحي
حرام أحب شخص ما يحسب بالبشر تفريق
تغره بعض الأشياء .. يندفع مع كل مزاحي
تغطرس في جماله والطرب ويهزه .. التصفيق
على عمياه .. يطرد له سراب وسط .. صحصاحي؟
وأنا مليت من ممشاه بس القلب .. عياء يفيق
يطاردني خياله .. بد من جاني .. ومن راحي
ونفسي راضية فرقاه حتى .. لو معاد أطيق
تعرف أن عزها مهما حصل مبداي ووشاحي
وترى من باعني بأعذار .. ما دقق معه تدقيق
ولا عندي على خزنة مزاج الناس .. مفتاحي
هويت البعد كني طير .. يهوى الجو والتحليق
وحتى لو كفخ قلبي رضى بالبعد وأرتاحي
أموت «بوحشة الغربة» ولا تكذيب والتصديق
ولا يضحك علي في حبي المجنون والصاحي !!
تخير لك عشير ثاني وطلب لك التوفيق
وأنا في نعمة النسيان دكتوري وجراحي !!
