يدوم نايف مثل ما الأمن نايف
عضيد من بالعدل للشعب حكام
ولازال أمن وأمان والخصم خايف
ودستورنا القرآن واحكام الإسلام
حكامنا اللي بالسيوف الرهايف
نادوا بشرع الله وتحطيم الاصنام
آل السعود مشرفين الصحايف
اخوان نوره لا تناخوا للاخصام
وحنا بخير ولا علينا كلايف
واخصامنا يبقون خاسين واقزام
وقلوبنا من فضل ربي ولايف
واللي يخالف له قوانين واحكام
وحنا شعوبٍ ما نعرف الحسايف
ما راح قلنا راح والعز قدام
ومن خان ببلاده يشوف الكسايف
لا طاح طاح وخاين العهد ما قام
واللي مع العدوان قلبه مهايف
ما يدري ان اعداه حطوله الغام
جاهل ما هو في نظرة العقل شايف
غرر بتفكيره وسافر للأوهام
قالوا له انت اللي عديم الوصايف
ما فيه مثلك لا جنوب ولا شام
انت الشجاع اللي علومه طرايف
وحطوه خبطه للمجالس والإعلام
ونهايته في كل مذهب طوايف
من خان ببلاده نهايته الاعدام
والله يعز الأمن ويعز نايف
ويصون دار طبقت حكم الإسلام
