أهلا بمن سعده غشى الضلع واسهال
ووادي الحريق وعاليات الخشوم
هضبة عليه رحبت بك والاطلال
اطلال تركي سيلتها الغيوم
الغار رحب يوم جيته ولك قال
اهلاً حفيد مسددين السهوم
حفيد شيخ ما جزع وقت الاهوال
في حين الاجرب له خوى عزوم
حتى انفرج دربه وفي موطنه جال
وارجع على حكمه وسد الثلوم
واليوم زرتو مزبنه نايف الجال
هضبة عليه كم زبنها قروم
ما بين ابو فيصل وابو فيصل اجيال
الى غاب نجم جا محله نجوم
ومن النوادر صرت يا زين الافعال
ظلك يظل اللي لفحه السموم
يا ابو فهد يا طيب الجد والخال
يا باذل المعروف في كل يوم
باسم الحريق وباسم من فيه نزال
وباسم المفيجر حاشم ومحشوم
وباسم نعام بين ساكن ورحال
صغيرهم واللي لربه يصوم
نطلبك ياللي للمهمات حلال
جالي عن المهموم ضيم الهموم
باسم الجميع ارجوك يا طيب الفال
توصيلهم خط جرى له رسوم
الا أن تنفيذه تأخر ولازال
وعساه من جودك وخيرك يدوم
يفرق من المنسف قدر عشرة اكيال
مع مثلها حتى نعام معلوم
ويحل ربي عنك عضلات الاشكال
حيث ان نفع الخط ولله عموم
يا صانع المعروف بالحال والمال
عسى حياتك بالسعادة تدوم
