يا راكب اللي ما بهن ماكر الخور
عيرات يقطعن السهال البعادي
ما صفرن بالسيف والحرث والهور
ولا قيضن بأرض الدعث والقرادي
مرباعهن ما بين عرعر وابا القور
يرعن زهر نوار عشب الحمادي
ولا لافتن لعيالهن عند مقهور
بنات هرش كل أبوهن اتلادي
يلفن على اللي فوق لينه بنا سور
توكدوا من غازي جاه عادي
الحر بنوا له بيوت كما القور
وتحضروا فريسنا للجهادي
وقام الطنا يزمي على كل ممرور
وربعي مروية الغلب والهنادي
يتلون من يرجع له الرأي والشور
الشيخ ابن جبرين سقم المعادي
نخيلان خيال الملازيم مسطور
عوق الخصيم اللي براسه عنادي
شيخ تسلسل من شيوخ لهم دور
من ماكر طيره ليا هد صادي
زعيم قوم دللوا شمخ الخور
أسباع بر ماربوا بالبلادي
أحرابهم تضرب على مشة الزور
مثل الجمال الصايجه بالهدادي
