لا هنت يا من قال حانت وآنت
لا هنت يا شيخٍ تحيزم بسلطان
ولا هان شيخٍ له الأصعاب لانت
شيخٍ ولد حاكم سلايل كحيلان
حاكم حكيمٍ به الامجاد زانت
من وقتنا الماضي ليا وقتنا الآن
رمز البلاد اللي على العز صانت
ورمز الوفا والطيب والجود وحسان
سلطان كل الناس يمّه تعانت
حتى عدّوه جاه خاضع وندمان
زبن الدخيل اللي حياته تدانت
وعوق الخصيم اللي من الحقد مليان
وكل الثقايل عنده اليوم هانت
ومال الثقايل غير مثله بليهان
وكل الأمور المغطيات استبانت
قدام سلطان الوطن شوف الاعيان
وكل الامور المعضلات استهانت
قدام شيخ شوفته تجلى الاحزان
كم أسرةٍ جت له من الوقت عانت
وعقب العنا فرّج لها الهم سلطان
وكم من مريضٍ فيه الاوجاع بانت
ومن عقب عوله صبّح اليوم فرحان
ويا ما فعل خير وللرب قانت
يبغى العوض من خالقٍ كل الاكوان
والمملكة ما فيه يوم توانت
عن نصرة الاسلام في كل الاوطان
وكم دولةٍ جالت لها واستدانت
وياما عطت من دون عدٍ وحسبان
مرفوعة الهامة ولا يوم خانت
ويشهد لها التاريخ من ماضي الازمان
في ظل منهم بالمسيرة تفانت
آل السعود مطوّعة كل خوّان
غصبٍ على اللي مع قسا الوقت شانت
وغصبٍ على اللي تابعٍ كل شيطان
وحيّاك يا من قال بالقول حانت
يا بن سعد طير السعد طير شيهان
خالد لك الطولات بالحيل دانت
من فعل كفك يا ولد مروي الزان
ويا مير كلمتكم ليا قلت مانت
مانت علينا ولا بها قول بهتان
آمر وتلقانا ليا قلت كانت
اربع افواجٍ كلها دون نقصان
وصلاة ربي عد ما لشمس بانت
على الرسول المصطفى نسل عدنان
