ماغبت والله غياب الشاعر إحساسه
لكنها غيبة ماكنت قاصدها
لا تلومني بالقصيد الروح حساسه
شهر وأنا بين أجاهدها.. واكابدها
سمحت للناي يدرس روحي دراسه
حتى عزفها شعر وأشعل مواقدها
لكن قبل لا يطيح الجوخ والطاسه
بقلب أبوساحه الشعر وقصايدها
عليك يابوعيون تقطر ألماسه
عليك يابو عيون ذقت موردها
أذكر هدب عينك اللي تبري أقواسه
لا صابني قلت: تكفى يا حلو عدها
وأذكر جبينٍ ليا مر الهوى باسه
وأذكر صباحاتك اللي جد فاقدها
وش جابني للمكان اللي على ساسه
ناسٍ بعزلة.. وقلت: أروح وأسعدها
ما كنت حاسب حساب القلب وأجراسه
ولا كنت أعرف إني آبرَوح في يدها
هذا وأنا شاعر ما عنده سياسه
من وين ماجت هنا قام وتوسدها
والشاعر إن ماملا بالحب قرطاسه
تاخذ عليه المشاعر.. لو يعاندها
وأنا بلا الشعر رجلٍ مرتفع راسه
والا القصايد.. أوقفها.. وأقعدها
