سبحان من يسمع قلوب تشاكيه
شي حداها من صوادف دهرها
رب رفع سبع تعلى لاراضيه
سامع دبيب النمل بأسود حجرها
لأحدٍ على اليوم يبدي مشاريه
لا بيّن بعيني دواعي كدرها
دام الحزن فيني كثيرة طواريه
والحال عند الله تلقى خبرها
وش حيلة اللي غاب شيخه وراعيه
مثل النجوم بليل خاسف قمرها
مرحوم يا شيخ رفيعه مباديه
حيثه بذكر الله حياته عمرها
أبو دخيل اللي من الناس نرثيه
عقب الممات وعقب دار هجرها
في ما مضى تدرج على أرضه خطاويه
واليوم عقب العز يسكن حفرها
ثمان لبنات بقبره تواريه
تطوي حياة الشيخ مع طيب أثرها
يا جعلها في دار خلد مواطيه
فيها تقر العين يهني نظرها
ومن جنة الفردوس يا رب تسقيه
صافي عسل ولا لبن من نهرها
أو خمر يلقى شاربه لذة فيه
والماء ما هو بأسن صفى من كدرها
كل على ما دبر الله يأتيه
في دنيته مكتوب يلقى قدرها
صلوا على المختار مبعوث واليه
ما ترعد غيوم هميل مطرها
