هاضت الافكار مع ليل الغرام اللي سريته
الغرام اللي بقلبي بالسنين الماضياتي
يعلم الله ما بغيت أقواه لكني قويته
انتصرت برغم موجه والرياح العاتياتي
من كثر ما أغليه كل اللي مسوي لي نسيته
محرم حتى عيوني من ملذات المباتي
والزمان اللي مضى ما هي حسوفه لو بكيته
شد بركابه على ظهور الليال المسرجاتي
صاحبي حلمي الطويل اللي صحيت وما لقيته
بس أحسه ساكنٍ قلبي وله دور بحياتي
كان دايم واقفٍ جنبي قريّب لا نخيته
وكنت أحس بقرب خلي أمن من بعد الشتاتي
آمرٍ ناهي ولا يزعل عليّ لامن نهيته
كاملٍ والكامل الله فيه من كل الصفاتي
خاتمٍ كله ذهب خالص وأنا لحالي شريته
غاليٍ والزين تفداه العيون الغالياتي
