يا ونتي ونيتها وقلت يا حيف
ريف النشامى كيف يسكن خلاوي
يا شيب عيني كل ما هبهب الهيف
ويا جرح قلبي مالقا له مداوي
ويا ويل ويلي ما تفيد التحاسيف
وياهم حالي طول شط وحاوي
حزني لجا بالقلب بين السراجيف
تمضي حياتي بالبكا والنعاوي
لولاي اخاف اللي عبدناه ماشيف
لا اطش روحي بالبحر بالف هاوي
على الشجاع اللي لربعه تقل ريف
ولا هو بروحه دون ربعه غلاوي
حزني على فرقاك يا مروي السيف
لو اتمنا ما تفيد المناوي
خمسة عشر عام وحنا مواليف
صار الغلا ما بيننا بالتساوي
ماشان ابو مطلق ربيع المناكيف
لاجوه طاويهم من القفل طاوي
له ربعة يلقابها البن والكيف
ماكن ثاني عند غيره قهاوي
محوال للشيخان ومدهال للضيف
ونجره ينادي للمشاكيل عاوي
