صرت أتذكر ماضي الوقت يا عمير
ذيك السنين اللي تقافا عددها
واحن للماضي حنين المصاغير
حنة خلوجٍ بعد موتة ولدها
وقتٍ مضى فيه الرجال المغاوير
دين وكرم وأخلاق كلٍ حمدها
فيهم بساطة والسماحة وتقدير
وصفاء النفوس اللي قليلٍ نكدها
عشنا على الفطرة ودرّ المغاتير
وطيب القلوب اللي قليلٍ حسدها
واليوم شفنا مجتمعنا ظهرغير
فيه القلوب السود واضح جهدها
ناسٍ خطاهم ينسبونه على الغير
ويقولو ان الوقت هذا كبدها
الوقت هوالوقت ما فيه تغيير
العيب فأهل الوقت والخافي أدها
أهله هم اللي صار فيهم تغايير
ناسٍ تغير يوم ربي قردها
جونا هل الخارج جموع وطوابير
وجابوا لنا عاداتهم من بلدها
ضاعت قيمنا بين جهال وصغير
في شينها ما شفت واحد نقدها
