باسم السديري كاسب الطيب حييت
عداد نواهل واخضر نباته
حياك ربي عد من طاف بالبيت
وزار المدينة وانحنى في صلاته
يقولها عبدالعزيز ألك تثبيت
الاحمد اللي كاملاً في صفاته
خالك يعزمك وانت في وعده أوفيت
ودوم الوفاء في الرجل من طيب ذاته
خالك وله حقاً بوصلك واتميت
مالك على الدرب اليسار التفاته
وخال الملوك اللي ورد جيشهم هيت
اللي صقيل السيف تروي شباته
وخال الزعيم اللي على خير توقيت
صان البلاد ابحنكته وبدهاته
فهد ذرانا يوم ولعت بكبريت
يوم إن عج الحرب دارت رحاته
في لحظة صارت على كف عفريت
وكلً من اللي شاف يبست شفاته
فهد ليا قال اكثر الناس يا ليت
الشعب كله يلتحف من عباته
عز الله انك من وصاته توصيت
اللي تعجز الكتب عن معجزاته
انت الأمير اللي على العود سميت
هاك الزعيم اللي نعيش ابركاته
عبدالعزيز الفيصلي ذايع الصيت
ارسى قواعد دولته من ثباته
اللي بعهده شيدوا منبع الزيت
والتف شعبه تحت فيّة عصاته
يا نادراً في قمة المجد عديت
يفرح بك اللي موكب الركب فاته
يا نجم ياللي في سماء الغاط طليت
ساعة قدومك كل شخص امناته
المدح باسمك جاء على ما تمنيت
في حزته يا مير هاذي طراته
يسمو على اسمك يوم بالجود مديت
يمناً كرمها دوم عذب افراته
انا اشهد أنك في هذا الوقت سنيت
نهجاً على المحتاج نلت اثمراته
وانا اشهد انك بالمكارم تحليت
ولو لا فعول الرجل وش هي حياته
وانا اشهد انك يا بيض الوجه سويت
فعلٍ الى آخر يوم تبقى ارواته
كم واحد صدره يجر التناهيت
فرجت همه لين كتبت براته
يطلب اعلاجه وانت قمت وتقصيت
باحسن عمل جعلك تنال ادرجاته
يندبك باسمك وانت للصوت لبيت
فزعتك للملهوف تجمع شتاته
انت الطبيب اللي بوصفتك داويت
جروح قلب مطوّلٍ به اسكاته
لو جيت اعد اللي تسويه ما حصيت
اجراً عسى بكره تجيك احسناته
عبدالعزيز اشوف بالعين واوحيت
والرجل في ما شاف عينه امراته
عبدالعزيز ان كرروا ويش خليت
يا قل والله من يسوي سواته
عبدالعزيز يشدني حيث ما جيت
كل العلوم الطيبة من سماته
انت الأمير اللي بجودك تماديت
عذر القلم لوفيك غلق ادواته
يحفظك ربك كل ما أصبحت وأمسيت
وانتم دعاة الدين وانتم احماته
وختامها ذكر الولي محيي الميت
اللي نصر جنده وحطم اعصاته
