باسم الذي نزل تبارك وياسين
سلام يا شوق المعالي مناها
يا بن الذي قاد أربعين مغيرين
وحد شتات الدار وأخزى عداها
عساه بالجنات بين النبيين
ويظله بظله مع أصحاب طه
وأدام ربي للوطن خادم الدين
راس الملوك اللي يذري ذراها
فهد ذرى شعبه حبيب الملايين
اللي تحب ملوكها من وفاها
حنا لسيد كل الأمة محبين
وقلوبنا للفهد تعلن ولاها
بالشرع يحكم ما حكم بالقوانين
عادل وسنة خير الأمة رضاها
الله يزيده طول الأيام تمكين
عز البلاد بسطوته واحتواها
عسى فهد يسلم لنا قولوا آمين
ويطول عمره للبلاد يحماها
ويعيش أبو متعب ذرى للمساكين
اللي لعبد الله تسارع خطاها
لا جوه عادوا من سموه بتطمين
يا ما قلوب به تحقق رجاها
ويا مرحبا ترحيبة القلب والعين
داورد هلت من وطيتوا ثراها
باسم المحافظ والرجال الميامين
حضر وبدو في مدنها مع قراها
الكل هلو فيك والكل فرحين
بملفاك يا ريف القلوب وهناها
سلطان حنا في سموك سعيدين
وزيارتك نفخر بها ونتباها
فضلك زرعته في قلوب الكثيرين
لك سيرة عطرة تردد صداها
يموت منك الفقر ويفارق الدّين
ناس تزايد من زمنها غثاها
ياما دعولك بالصلاة المصلين
وياما قلوب لك تكرر دعاها
رمز الوفا والوجود والعطف واللين
وضحكة حجاجك تسعد اللي يراها
وحنا لنايف مخلصين مودين
وزير الأمن اللي بجهده دراها
بوجود نايف دارنا فالها زين
بجهوده المولى بأمانه حباها
وأيضاً نثمن دور سلمان تثمين
أمير منطقة الرياض وضياها
يسعى لتطوير وحضاره وتحسين
كل المدن حتى تبين حلاها
وتقديرنا له ما يبي له براهين
نرفع له البيضا بعالي علاها
يا سيّدي حنا على العهد باقين
ما في ولانا شك والا اشتباها
وللأمر حنا طال عمرك مطيعين
والدار.. الأرواح العزيزة فداها
أنتم هل المعروف كل الأحايين
أهل القلوب اللي تبين غلاها
وشرٍ على الحساد هم والمعادين
حسادكم.. ما يسعد الله مساها
وحنا بحمد الله من الخير معطين
في نعمة ما حد يدور سواها
بذلتوا الجهد بجميع الميادين
معيشة الشعب ارتفع مستواها
بأمن ورخا في ظلكم يالعطوفين
نعمه عساه يديمها من عطاها
حماكم اللي خالق آدم من الطين
يا عز دارٍ تفتخر بانتماها
وجهودكم ما تنوزن بالموازين
لكن على الله يا بو خالد جزاها
ترجمت في شعري شعور المودين
اللي لكم بالحب تعلن ولاها
ولك يا عزيز من رجال عزيزين
سلام يا شوق المعالي مناها
