الكلمه اللي قالها فلان.. بفلان
ماهيب عيب ليا ذكرها قباله
ودك ردي النفس دايم بنقصان
عطه الصحيح ولا تفكر بحاله
صحيح وصتنا الشريعه بالإحسان
ندري بعض ناسٍ خذتها الجهاله
نسكت ونرمي للأمل شوف الأعيان
وكلٍ على ما قبل يلقاه فاله
لكن بعضهم لو تلاشيته أحيان
تقول كنك سارقٍ من حلاله
يصير لك عله وهو طايح أثمان
عند الرجال اللي تعرف الرجاله
لازم توريه التحدي على شان
يمسك ذرى بيته ويستر عياله
يعلّم عياله.. ترى الناس عدوان
من جالهم بالشر يمرح لحاله
لا تلحقون الناس لو كان ما كان
أبوكم اللي شاب مما جراله
أخطيت في حق البعض والخطأ بان
ما نيب قده والحبل من خباله
والكلمه اللي قالها فلان بفلان
ماهيب عيب لياذكرها قباله؟
