ساحة الشعار اسولف بالقضيه
أو أخفي هرجتي بين المحاني
والله اني ما تعودت الخفيه
والشعر والقاف ما يوم عصاني
ساحة الشعار صابتها اذيه
بين غث وبين لمز وبين جاني
واكثر الشعار شاعر عنصريه
واكثر الشعار قيفانه تعاني
واكثر الشعار ينحر في خويه
واكثر الشعار صاروا ببغاني
واكثر الشعار ما عنده حميه
واكثر الشعار يا عالم جباني
واكثر الشعار صاروا حنشليه
واكثر الشعار عوّد للطماني
وأكثر القلطات صارت فارسية
واكثر القلطات تبغا ترجماني
الهجيني يكتبونه سامريه
والهلالي يقلبونه ليل داني
ساحة الشعار خليها عليه
وابشري باللي تحقق لك أماني
ويا مغني ليش ما تهدي شويه
وين ذوقك يوم تختار الأغاني
القصايد في معانيها غنيه
كيف شاعر جاهل كل المعاني
كيف تكتب لك قصايد ساحليه
كيف تهدم ما بنيته في ثواني
يا عرب يا ناس وين الشاعريه
وين من هو في معانيه السماني
الشعر يا ناس يا عالم سريه
وين قايد هالسريه لا تهاني
عارفه حرفي وكني به شظيه
في وجوه اللي يهدون المباني
لا تقولون حضريه وبدويه
المهم اللي كتبته في بياني
القصايد لقبتني بالذكيه
والقصايد شاعره باللي دعاني
شاعره واكتب حروف نرجسيه
معجب حرفي جميع اللي قراني
يا عميد الشعر عندي لك وصيه
اعذب الأبيات خذها من لساني
