انا البارحه همي عن النوم سراني
وعيني تهل الدمع والدمع محفيها
على ابوي يا خالي دموعي تغشاني
ولاحدٍ يلوم العين في فقد غاليها
ابوي الشجاع اللي للاجواد مزياني
ملاذ الرجال اللي كبارٍ هقاويها
ابوي الكريم مكرّم الضيف والعاني
تراحيب«ابويه» ساكن الحي يوحيها
ابوي الكريم اللي للادنين ودَّاني
تفز الكبود الممحله يوم يعطيها
ليا جاه مسكين من الهم زملاني
يقوم بلزومه والمطاليب يقضيها
حشيمٍ يحشمه قاصي الناس والداني
حليف الرجال اللي ثقالٍ معانيها
على ابوي في صدري لواهيب ضياني
من العام ما بردت على الكبد صاليها
عسى ابوي فالجنه مع الحور سكاني
برحمتك يا خلاق الانفس ومفنيها
