سريت مسرى مع همومي وسريت
ليل سرى بي مع جميع النحايا
حتى بدالي مشرق النور وابيت
عن ما يدور بداخلي من خفايا
سكت ما فيه الكفايه ومليت
من كثر ما اسمع منك سرد الحكايا
يا للي بتجريح المشاعر تماديت
وسويت لك باسم المحبه سوايا
بالله للعذال وش عاد خليت
حملتني مع كل شامت زرايا
لا تعتذر عن ما تسوي وسويت
دامك توددبي سهوم المنايا
عذر الخطا ما يغفر الذنب لا خطيت
لا صار مع عذرك تزيد الخطايا
ارتح وريحني عسى ما تعنيت
ما عاد باقي لك بقلبي بقايا
عندي تساوى الوضع لن رحت وان جيت
فالحالتين جروح قلب وكوايا
ما جت لي الهقوة على ما تمنيت
تغيرت بين القلوب النوايا
واقفيت اسوق اخطاي يوم انك اقفيت
على دروب الهجر سوق المطايا
أجر بالونات بيتٍ ورى بيت
يصفي عليهن من جروحي مزايا
ماني مغنيها طرب يوم غنيت
الا من اللي ما كنٍ فالحنايا
سلواي معها كل ما أصبحت وأمسيت
أغلى على قلبي من أغلى الصبايا
