الله يعينك قم تلاحق سنينك
جفت يدينك وانت عايش بالأحلام
فكر بعقلك لا تفكر بعينك
شف كم راح من العمر بس بأوهام
يا خامل الهمة من اللي يعينك
لو كنت بالقمة تبي قلب جزام
وشلون وانت أفعال نفسك تدينك
تحكم على امال عمرك بالإعدام
محدٍ بيسأل عن عنادك ولينك
ومحدٍ إذا تحتاج يوهب لك أيام
إن ما طبع لون الليال بجبينك
ما يرتفع لك بين كل البشر هام
ما أحد بيهديك الحياة بيمينك
إن ما عسفت الروح واتعبت الأقدام
إن كان هذا الفرق بينك وبينك
بينك وبين أندادك أعوام وأعوام
راحت سنينك قم تلاحق سنينك
شد الركايب والأمل دوم قدام
