أنا شف بالي مجلسٍ فيه هبة ريح
بعيدٍ عن الشكَّه بعيد عن الريبة
أواجه به اللي قربهم يجلب الترويح
لنفسٍ ملوله من مجالس هل الغيبة
أبا أبعد عن اللي شغلهم بس فالتشريح
لحوم البشر تشريحها عندهم طيبة
وأبا أجالس اللي علمهم ما يبي تصحيح
نشاماً على ما قيل عملتهم صعيبة
رجالٍ سوالفهم بعيدة عن التجريح
فريد القصيد الجزل والطاهر تجيبه
قصيدٍ مثل ما قال راكان وشليويح
ولا فيه علمٍ غانم إلا وتحري به
وإلا ما حلى قدام شمس الغروب تطيح
ليا من تواعدنا وكلٍ عرض جيبه
وركبنا على اللي ما يبي قطعه وتصليح
جديدٍ ومن جرب ركوبه يوصِّي به
قوي التحمُّل يغضب اللي فتح تشليح
يوديك جو توما خضَّر شعيبه
وجبنا الحطب والنار شبت بعد تبريح
ومن فضل ربي كل شيء بترتيبه
تعاليل والزحزيح ينصت له الزحزيح
عظيم الأدب يضفي على المجالس الهيبة
ويزيد الوناسة فوح ريح النفل والشيح
من الوادي اللي ودك سنين تمشي به
هذيِّه طراة العمر مع كثرة التسبيح
للا الدين كان الرجل ما ينستر عيبه
