يا صاحبي قلبي من الوقت مطعون
كنك بحد السيف الأملح تجزه
زول يدوج وداخل الزول مطحون
يطيح لو باصبعك الأصغر تدزه
عنده كنوز من الذهب مار مديون
عقله يجي فترات حزه وحزه
تسعين رزه حدرها العقل مضمون
واللي بقى مسمار واحد برزه
في داخله موجود عاقل ومجنون
كل على يمة طريقه يكزه
يا قاده المجنون مبداه موزون
كنك ببستان القوا في تنزه
قصايد فيها هل الشعر يلقون
ما يمسك اطراف الشعور ويهزه
وياقاده العاقل على المشي مفتون
مافيه شارع بالبلد ما يقزه
راسه عنيد وبالعفاريت مسكون
كن الرعد ياقف عليه ويرزه
لا يقبل العوجا ولايتبع الهون
يجتر ماضي زين وقته وعزه
متحيرٍ كنه على حد مسنون
مستسلم كل بموسه يحزه
متكهرب جوه من الغيض مشحون
دقة جرس هاتف غلط تستفزه
حيً بدون إحساس ميت ومدفون
مرياع يسحب له من الصوف جزه
عامود والعامود واضح ومبخون
لو أنت مع تسعين هندي تغزه
متثلم راسه من العيب مدهون
تشوف عيبه كل عين تخزه
يا صاحبي ليت المساكين يدرون
ماني عن الزله رسولٍ منزه
انا العليل اللي مع الشعر مقرون
خيله تجول ويهتويني ملزه
وين الفضا لولاه يا ضيق الكون
يفز له قلبي ثلاثين فزه
يا صاحبي ما عنك خافي ومكنون
أخذت من سم الثعابين مزه
قلبي مهو عندي من الغبن مامون
كانك تبي عندك توزيه وزه
يا صاحبي مليت وابليس ملعون
موت الفتى وإلا حياة المعزه
