ياما سهرت الليل والخل نايم
مغير أفكر واشغلني تعاليل
وياما بكيت وفرحة الخل دايم
عزاه يا دمع جرى يشبه السيل
بالليل ذقت الظلم وقت الظلايم
والخل مايدري عن الهم والويل
ياخل أنا في حبك اليوم هايم
لو غيروا جيل بعد جيل مع جيل
أنت الحبيب اللي على القلب دايم
غيرك يمين الله بالقلب ماشيل
ياطير شفتك في سماء الحب حايم
بعطيك أنا ياطير للخل تفصيل
واحذر تجي ياطير والجو غايم
إليا صفا جوه وراح العواذيل
واحذر تبين قصتي عند لايم
تكشف خفايا قلوب مهدودة الحيل
قل له يبي قربك وهو منك ظايم
يبيك لو صعبت عليه المواصيل
قل له ذكرته مع هبوب النسايم
والذكر ما يكفي بدون المراسيل
قل له محبك جافي النوم قايم
يبكي ومن حزنه يجر المواويل
واختامها صلوا على خير صايم
بعداد حبات المطر والمحاصيل
