يا نجم ياللي شمال النجم يغريني شعاعه
يا ثقيل الروح قبل تروح يا مال القطيعه
السماء فيها نجوم وكل نجم وارتفاعه
يالله انك لا تهين اهل المقامات الرفيعه
انت ياللي لك بعيني بعد ودروب وولاعه
ما تشوف الا النجوم ولا تحب الا الطبيعه
شفتك البارح ولا لي فيك قدره واستطاعه
وضاقت الطرقه بدرب اخطاي وارض الله وسيعه
علني بالوصل واعذرني على نقص المناعه
اشهد انك شلت فوق القلب مالا يستطيعه
كل ما سابقني الموعد ترددني قناعه
هي كذا والا كذا والا كذا والا فضيعه
فيك عالم شوق تقنعني براءات اختراعه
وفيك وقفه من شجاع وفيك من حرب الوديعه
لوعتك لوعه وانا لو قلت لك سمع وطاعه
ادري اني لو احاول فيك قلبي ما تطيعه
لانك اول شخص يثبت لي وجوده واندفاعه
ولاني اسهل صعب واصعب نجم بنجوم الطليعه
ازعلتني نظرة عيونك وهي فن وبراعه
ما وصلت الى الصحيح ولا تجاوزت الشريعه
