يا صاحبي جيت أعتذر لك وش الرأي
وما جاء بقوَّة ما رجع بسّهولة
ما جيت أذكِّر راعي الناي بالناي
جيت أحسم الموقف بموقف رجولة
لا تحسب أن أكثر من الرايح الجاي
العذر واحد وأنت حرَّ بقبوله
وإن كان ودك تسمع العذر بشفاي
هذا وأنا قدام عينك وقوله
اما تسامحني على جملة أخطاي
وإلا نكف الهرج عرضه وطوله
يرضيك يومك بالزعل ترضي أعداي
ما تدري أن اللي جهلت احسبوله
منهم حسودٍ ينتظر يوم فرقاي
بيني وبينك ما تميز ميوله
الجرح جرحك والدواء عندك أدواي
من طيب خاطر كلمتين امعسوله
«مالك عذر» تاقف على فهم معناي
يكفيك عن جسم المعذب نحوله
والغاية اللي من وراء سرَّ نجواي
يصعب على من يبتغيها ينوله
وكانه على بالك تبي تعرف أقصاي
والله لتبطي والهدف مأنت حوله
