البر يا للي متعبه طول مقعاد
جا وقته وما عنه باذن الله صدود
شوف السحايب غطت الشمس تنقاد
تحجب شعاع الشمس وبروق ورعود
ثم نثرت ماها عقب صوت رعاد
وارخت على بعض الرياضين ببرود
والسيل يقلب فالعجاجيم جلاد
لين ارتوت نجد ونبت ميت العود
ولبست ثياب تعجب العين وجداد
وتقلدت خضر المزاهير قالود
واليوم الآخر غيمت والمطر عاد
وتباشروا بالخير رعاية الذود
والبدو في قفايته عنه نشاد
كنه يبشر كل واحد بمولود
دشوا الحلال اللي على العشب معتاد
لا يتعب الراعي ولا زاد مجهود
كل البسيطة مخضره والخضر ساد
واللي يحليها بخاتير وورود
والطير في ميالة العود نشاد
نغمات صوته تنقله هبة النود
نضره وحيده تجعل العمر يزداد
تجلى الهموم اللي قبل شوفه تزود
والجو ويش الجو نسناس وابراد
ريح الخزامى فيه ما هو بمفقود
وان غابت الشمس وضوى الليل بسواد
لا تحسبنه ايقول من غير مطرود
جاك القمر نوره على طول وقاد
بدر التمام بليلته ذيك موجود
ياللي تشب النار دله وبراد
برية اتداوي اوجاع لكبود
لو جلسته تغني عن الشرب والزاد
من بعد ماني فالميادين مضهود
لولا مصاليحي وشغلي والاولاد
حلفت دين الشرع والله ما عود
أحسن لي اروح عن النفس وارتاد
ولا غلاها والله ان ماله حدود
فوين الرجال الوافيه روس الاجواد
الجود ماله صدة من هل الجود
نبغى لنا سجة نشاما بميعاد
والباب عن سجة هل الشر مردود
في النشرة الجويه اشوف الارصاد
ومجلاسنا من عقب ما شفت منقود
