يا عساك ليا بغيت تروح تذكرني وتذكر ما مضى لك
لا تسويها وتتركني كذا من دون ذنب ولا خطيه
عذرك إني قلت لك كلي حلالك ليه تسرف في حلالك
والنبي وصى عن الإسراف وانت فيّ ضيعت الوصيه
غرتك صورتك بين الناس واطغاك التباهي في جمالك
لين قلبك صار مثل الصخر لا يأوي ولا به مرحميه
ودي إن اللي جرى لي مع دروب الشوق يالمترف جرالك
كان عمرك ما تلحقني ملام وكان ماتشره عليه
وتعرف إني ما طلبتك شيء كايد ما طلبت إلا وصالك
وانت تقدر تعطي المحتاج ما يبغيه ويدينك مليه
مد لي يمناك لا تجرح شعور اللي يمينه مدها لك
يا خوي خابره لو صد وابطي ما نسى وقفة خويه
كيف تنسى من بذل روحه وحاله للشقاء من دون حالك
ما يهمه في وصالك صائب الاقدار وسهوم المنيه
ساق رجله مع دروبك فالخطر والخوف وانواع المهالك
ويوم فكر بالرجوع لين ما باقي من أيامه بقيه
وبعد شافك صاح بأعلى الصوت باسمك وانتخالك
ما كسب غاية رضاك ولا كسب ضدك ولو مرة قضيه
