يابوفهد من هاجسي هاك الأخبار
أخبار فيها من قسى الهم لوعه
أنا الحزين اللي عليه الزمن جار
وليا ذكر ماضيه سالت دموعه
يابوفهد همي كبر ضلع سنجار
ومن البكاء صدري تكسر ضلوعه
أبكي على راع الشكالات والكار
أبكي على اللي بالمراجل طبوعه
أبكي على اللي له مع الناس مقدار
أبكي على اللي تقتدي به ربوعه
يابوفهد دمعي على أبوي مدرار
اللي مطاليع السعد في طلوعه
أنا على فقده تجرعت الأمرار
قبل يغلّق بالعنايه اسبوعه
واحمس قلبي حمس بنٍ على نار
من واهجٍ باقصى الضماير شموعه
خليتنا يا مكرم الضيف والجار
قفيت عنا والليالي بتوعه
يابوي وينك يا بعد كل من سار
يابوي فقدناك على القلب روعه
إيوالله إنا فاقدينك عن الدار
ياللي علومك بالجزايل سنوعه
حل القضاء واللي كتب ربنا صار
والنفس ما هي من قضا الله جزوعه
يا كثر ما يلهج لسانه بالأذكار
ويا كثر ما نومه على راس كوعه
وياكثر ما قام يتهجد بالأسحار
تال الدجى لله كثيرٍ ركوعه
يالله عساه بمنزله عند الأبرار
في جنة الفردوس نفسه قنوعه
يا خالق الجنة ويا خالق النار
اجبر عزى اللي فيه سالت دموعه
