مرحوم ياللي مات بديار الاجناب
بتلا شهر شوال جته المنيه
مرحوم يا شيخ قضى العمر ما عاب
عليه منى كل يوم تحيه
مرحوم ياللي للجزيلات كساب
ياقل جنسه في جميع البريه
قرم كريم ومن عريبين الانساب
عيال روق اهل الوفا والحميه
والموت حق ولا عن الموت مجناب
لكن ابو نواف موته رزيه
ياموت لو دونك يردن الاسباب
تبدل ولكن ما لنا مقدريه
الموت ما ينفع معه طب الاطباب
والعبد مأمور بكتب الوصيه
يا الله يا للي خالق آدم من تراب
تجعل ثرى قبره رياض نديه
يا الله لعله مع محمد والاصحاب
خالد بجنات النعيم العليه
واجبر عزا نواف مع باقي الاقراب
واجبر عزا نايف زبون الونيه
يا عنك من خلفك حاضر ولا غاب
يا عل تفداك النفوس الرديه
لا تحسبك يالقرم بس انت منصاب
الجرح واحد كلنا بالسويه
لكن نرضى اللي كتب رب الارباب
نصبر ونرجي ما وعدنا نبيه
