يا سعود قم هات الدلال المهاديف
في ليلة ناخذ سهرها قطوعه
احمس وكيفها ترى طاب لي كيف
واستدن مزعل يا شفاتي وصوعه
الا تهيض بالعوي والزعانيف
يشدي عوى ذيب شكى حر جوعه
يشدي عوى ذيب بروس المشاريف
حادية حادي والهبايب تلوعه
حتى يجيب مسير البيت والضيف
مثل العقيد اللي تلافت جموعه
مخصوص لا صار الجماعة مواليف
ما ركز الشيطان معهم بكوعه
يا زين سجتهم وزين السواليف
ما دوروا واحد بالآخر طموعه
إذا احدث الجهال بعض التخاليف
استدركوها قبل تكثر أفزوعه
تلقا لهم سمعة وهيبة وتصريف
وكل يجي فعله على قد نوعه
