يقولون العرب بأن اللسان حصان يالفهمان
يصون اللي يصونه والخيانه لا ختلف ظنَّه
وأنا جبت الكلام اللي مضى لمعاتب الغلطان
تثبّت فالكلام اللي تقوله وانتبه منَّه!
لو أني عارفك ضايع ولا ينفع بك الاحسان
ولكن المشاعر حرضنٍ قلبي وحثنَّه
على قول الصراحة والصراحة للرجل نيشان
يدور الوقت واللي جابن الأيام ودنَّه
تغير واقع العالم وكلٍ حسّ بالنقصان
ظروفٍ شيبن رأس الحكيم وبردن سنَّه
يقولون الرجال ان الرجل ما يقبل الخذلان
وأنا في داخلي شيٍء عجزت اخفيه واكنَّه
وقعنا في زمانٍ ما يبيَّض صابر الشجعان
ود طنا في حكاوي ناس مغبونة ومنجنَّه
نجنبهم ولكن ما لقينا للمجنب شان
مشوا بعروقنا وعروقنا صارت لهم جنَّه
يراضيهم زعلنا والخطأ والذل والحقران
ويزعهلم رضانا وان بعد قلنا بلا منه
حمولٍ بركَّت من ثقلها من ثقلها بليهان
حمولٍ للزمان الشين جابنه وحطنَّه
وانا شاعر وابكتب عن خفايا الواقع التعبان
وترى للشعر رنَّه مثل ما للجرس رنَّه
اسطرها على بيض الورق وانقَّح القيفان
بيوتٍ للضمير الحي يرعاهن ويرعنَّه
ولاني بحاجة للشهادة من رخيص الشان
ابكسب هامة رجالٍ تقود الطيب وتفنَّه
وعلى قول العرب بأن اللسان حصان يالغلطان
توقع فالكلام اللي تقوله وانتبه منَّه
