من اوربا سرت وضح القصايد تنوي المدهال
تبي دار الوفا والطيب والمعروف والشاني
سرت يم الديار اللي غلاها في الحشا نزال
ديار آل السعود ودار ابوي ودار جداني
تذكرت الرياض وسال دمعي يا فهد همال
على طاري زمان فيه هلت دمعة اعياني
وتذكرت الحزوم اللي من الوادي تروح شمال
مرابيع الرجال اللي لهم في المجد مسكاني
وتذكرت الربيع اللي الى شعشع ونبته طال
يوسع خاطر اللي من عنا الايام عمساني
الى منه سمك عشبه وسيله تو دوبه سال
تطارد به مجاميع الظبأ ما فيه عرباني
يعله من صدوق الوسم نوٍ كل خمس الليال
زماليقه تمايل والزبيدي دوب ما باني
مداهيل الغزال اللي جرح قلبي وسم الحال
بسودٍ لا همس فيهن غديت بوادي ثاني
عشقته عشق مخلص ما يبي لجه وطول جدال
ألا يا زين همسات الهوى مع سيد خلاني
على بعده اقاسي حسرتي واستبشر المرسال
خفوق الشوق يم الشوق حرك جملة اشجاني
تذكرت وتعكرت وغدا حالي على ما قال
أسير الغربه المره هموم البعد عنواني
على ليل القصايد جيت وهموم الخفوق اشكال
هوى نجد العذية من بلاد الغرب سراني
