حييت يا رجل الوفا والشهامه
وسلمت يا سلمان ريف المراكيب
ياللي عليك من التواضع علامه
لزيارة المرضان واللي مصاويب
شيخٍ وله فالمجد ذروة سنامه
أمير نجد اللي يلبي المطاليب
دائم على العليا رفيعٍ مقامه
أبو فهد وأخو الفهد منقع الطيب
ورجلك يا بو نايف عساها السلامه
رجل منزهة عن الخبث والعيب
من عمرها ما وقفت فالملامه
على النقا وتزيد طيب على طيب
ولا هيب تسعى في دروب الرخامه
إلا على الزينه ونطح المواجيب
تنصا الكرام وهي مقر الكرامه
فاللين ولا فالليال الشلاهيب
وبين الخلائق ما مشت بالنمامه
ولا جرها المبعد لشذب العراقيب
رجل الذي بالطيب علق أوسامه
ماهيب رجل اللي يشيل المشاعيب
يسلم لنا راسه وتسلم أعظامه
النادر اللي ماكره بالمراقيب
