ياهل الهوى يا من يداوي عيوني
اللي تصبّ الدمع صبًّ كما الميّ
الحب بلوى والمحبه جنوني
وترى الجنون فنون راعيه مبليّ
الحب في ذا الوقت ماله زبوني
نادر تحصل وحدةٍ قلبها نيّ
يا صاحبي حاسب علينا بهوني
من فضلكم ترفق على قلبي شويّ
حمّلتني حمل يفوق الطنوني
ما يحتمل له لو يشيله جبل طيّ
طمعت فيني يوم قلبي حنوني
حصّلتها فرصه وصار الطمع فيّ
جدّدت في قلبي كثير الطعوني
كويتني والكي ما ينفع الكيّ
يومك تصدّق كاذبات الظنوني
عذرك تقول احسبت في خاطرك شيّ
حاربتني حرب الذي يبغضوني
كنّي على ما قيل صدّام وعديّ
واليوم تطلبني السموحه بهوني
طلبت مني رضاي والمعذرة ليّ
خلاص انا راضي ولا تزعجوني
غلاك ماخلاّني اشكي ولا احكيّ
انت الوحيد اللي علينا تموني
ما تطلبه ناتيك به لوه في دبيّ
اطلب تدلّل وش تبي من عيوني
والله ما ارفض لك طلب دامني حيّ
