كل قافٍ كتبته صار عندي خوي
وكل بيتٍ قريته اسأله من أنا
أشرب القاف علقم خاطري ماروي
ولو حصل لي زلاله ذلك يوم المنى
ذيب ياللي لمحته مقبل ومهتوي
يوم شفتك بقربي قلت موتي دنا
اسمع لصوت قلبي نبض يدوي دوي
كل نبضه بصدري يحتويها العنا
خل عقد المحبة يحتوينا حوي
نتفق يا رفيقي نبتدي من هنا
صادق الود دربه قاصر وينطوي
ولو تزود المسافه ناظره ما انحنى
وخاين الدرب عوده مايل وملتوي
ومستحيل يتبدّل ظل عود انثنى
لا تنادي المقفي خل قلبك قوي
ادع له بالسلامه وادع له بالهنا
ما يزيد المواجع غير غدر الخوي
وما يحر المدامع غير فرقا الظنا
آخر الطب وسم عقب لذع الكوي
وآخر الشعر بيتٍ اسأله من أنا
