بشروني بابتهاجه لاجل ابشركم بحاجه
ابتهاجي لابتهاجه مايضاهيه ابتهاجي
تضحك الدنيا بوجهي كان ماعكر مزاجه
لو اخفي فرحتي جوّاي يكشفها حجاجي
الغلا«بركان خامد» ينبعث عند المواجه
والمواجه يفتق حجاب السراير والمناجي
اهـ يا صرحٍ بنيته وانشطر مثل الزجاجه
وانتم ادري ما احدٍ يمتاز في جبر الزجاجي
اهـ يا عمرٍ قضيته بانبساطه وابتهاجه
راح مثل الحلم ذكرى صار مصدر لانزعاجي
عذبت ذكراي قلبي واحسب ان منها انفراجه
لين حاصرته بقوه واضربت فوقه سياجي
بلغوه اني مودّه لو غشى جويّ عجاجه
كم عجاجٍ سال عقبه وادي دمه عجاجي
واخبروه ان الهوى بلغ الشغاف وحط باجه
اقتنع والا اتذمر شي ماهو في مزاجي
وش يفيد اللاعب المقهور ترديد احتجاجه
لازعل منه الحكم ينهيه في كرتٍ مفاجي
