يا بير قل لي وش بلا البدو خلوك
جوك خلا يا بير وين الجهامه
وين البيوت السود ما كن حاضوك
وين الدلو يا بير هي والمسامه
وين العيال اللي مع الطي ذبوك
وين الكهول اللي عليهم عمامه
ما كنهم يا بير بالصوت غنوك
اتلاهم اللي ما تشيله عظامه
عقب القطين اليوم باسمنت صبوك
أنكرتهم وأنكرت صوت الحمامه
ما كنهم يا بير مروا ووردوك
واشوف عشب العام يابس رمامه
حولك مشيت وكني أمشي على شوك
ذكرتني يا بير بأهل الشهامه
ذيبك عوى يا بير من يوم صكوك
حتى الوحش ما يبلغ اليوم عامه
واليوم صرت تراث صوره على بوك
ومهما حصل يا بير مرفوع هامه
