يامل قلبٍ مثل اللهايب
بين الضلوع الحدب شبّت شبوبه
في ضامري تشبه لنار الحرايب
نارٍ تلظّى شفت منها العقوبه
ذقت العزاير بالهوى والمصايب
هني من درب الهوى ما مشوا به
ياوش جروحٍ في ضميري عطايب
ياكيف أبا ادله والجروح معطوبه
أطرب الى ذعذع نسيم الهبايب
وأثر الهوى صلفٍ تصافق هبويه
من صفقها راحت ضلوعي حطايب
واهل الهوى قلب المعنى غدوا به
أمسي وقلبي من هوى الترف تايب
واصبح وقلبي فيه شيٍ يلويه
بغضه دفنته تحت عوج النصايب
وحبه بنيته طوبة فوق طوبه
قالوا علامك قلت ما من سبايب
بس البلا في ضامري ما دروا به
ودموع عيني فوق خدي صبايب
مع عبرة في الحلق تقل مغصوبه
خايف من الفرقا وبعد الحبايب
وغديت مثل اللي يحسب ذنوبه
ياليت انا واحباب عيني قرايب
مير التمني ما نفع من حكوا به
