قصيدي لا ورد ملح المعاني ورّد البارود
تحت جنح الليالي لا صفت لك والطرب هادي
أباها في سنام المدح تبرق والرعود تزود
واباها اللي تحد الظلع واللي تدحم الوادي
واباها فالجواد اللي أبد ما مثل جوده جود
مدى التاريخ واللي كاتبه هجري وميلادي
لأن الشعر لو ما ينكتب فالسامر ابن سعود
يعيش بلا جناح ولا يقود وكيف ينقادي
ولأن الناس كل الناس لا مرت بقدح زنود
تلُوت حول بابه واهتنت بالشرب والزادي
أبو راشد عظيمٍ فالخصايل ما علاه الزود
على كثر النقايص فالبشر يا كثر ما زادي
وفيٍ كنه الما للعطش والجود والماجود
وأيضاً كنه الغيث المداد وزمزم بلادي
شجاعٍ بندقه تحمي وترمي والزمن عبرود
تحت ظل الفهد يفدي بعمره والعمر غادي
كريمٍ والله انك ما تروح وحملك المشدود
لو انه من جبال طويق لين جبال ابن هادي
بنوكه معرفه في معرفه ما هي رصيد نقود
رقا شعره بتاج المجد ما رقّته الامجادي
تقول ان السما صفحه وشعره في صدرها عقود
وتقول ان البحر بيت جزره وجاك متمادي
سلام الله عليه من اول الطايف إلى المحدود
سلامٍ فيه أزكى الطيب وازكى المسك والكادي
سلامٍ يحمل سيول المحبه والفواد سدود
وفا للي يعلمنا الوفا صادر وورادي
