النجم مل السهر. والليل قلبه جريح
والعين ميعادها. ماهو ميعادها
والبرق قبلك كذب لو كان ثغره مليح
والا السحابه بعيده والسما بلادها
والغدر فال البحر. والفعل من فعل ريح
والعذر للموجه. افضل تأخذ ابعادها
والنور عيّا يقف. والورد عيّا يطيح
هي غلطة الشمس والا زهر عبادها
والطير لومسته عقدة لسان الفصيح
غنا على الرابية مره ولاعادها
صحيح والقلب مثله؟ قلت فعلاً صحيح
لو تأخذه لا نقص مني ولازادها
يعيش لاحس من خلانه انه ذبيح
عيدين والنفس. جرحك ثالث اعيادها
ان جيت يمك لقيت الدرب يمك شحيح
وان جيت يمي دروبي هلّت اجوادها
وانا احسب انا تقاسمنا الثنا والمديح
خلان. والجرح بفؤادي وبفؤادها
واثر الملل ما يداوي علة المستريح
ان كان نفسك دواها. غيض حسادها
