الله على الهوجا طويلة مناكيب
حمرا ردوم وجالس مرجحانه
مرباعها من خشم لاهه وتغريب
في سهلة متخالف ديدحانه
تقطع محاويل المقور الضنابيب
بالقيض ما تشكي الحفا سعويانه
اول نهاره مشيها هورفت ذيب
وتالي نهاره مشيها زرق زانه
بارض السعين وقاع هاك العراقيب
مصباح خمس وهي بروض الشنانه
هوجا ليا حدوا عن الما بتجنيب
تنحر لها عد خفي البيانه
وان وردوا مع ماحيات العواليب
والما بعيد وهي توالي الذنانه
تورد على الما قبل بيض المحاقيب
مع الاوايل جيدات الامانه
ابي عليها مع عيال شراعيب
معهم صفوق الصمع كالجبخانه
تشاوحوهن واغرضوا بالمشاعيب
وشافوا جهام زارق ويضحانه
وخلوا رديين العزوم الزواريب
متبالشين بالحيل والذهانه
وصارن خزايزهم كبار الدباديب
تلقا بهم غير الكتايف بطانه
وعقب اخشروهم بالفذوذ العياديب
بالحشو والا فاطر عيدبانه
