جت تعتذر لي عن خطاه أمس وتقول
صديقتي منك العذر سامحيني
صديقتي للقلب زلات وميول
وأنا هويته.. غصب عني افهميني
هذي خفايا الغيب والغيب مجهول
وما ابيك لو طال الأسى تزعليني
انتي وأنا والشرع ما فيه يحول
ودامه شرع له أربعة اعذريني
وقعدت اناظر وجهها ذاك وأقول
البعض فعلا للوفا جاحديني
يا بنت انا ما أبي لك أعذار وحلول
دامك نويتي للأسف تجرحيني
روحي وخليني مع الجرح معلول
تكفين يا بنت العرب اتركيني
«وانا ترى قلبي كما الطير مقتول
وانتي بطير ميت تلعبيني»
وأقولها لوني تحت سيف مسلول
صداقتك ما تشرفن واعذريني
حتى الصديق اللي معك عنه معدول
ما لي بناس مثلكم خاينيني
با قفى عنك واقول لك درس محلول
صداقتك لي درس طول السنيني!
