Friday 3rd January,2003 11054العدد الجمعة 30 ,شوال 1423

     أول صحيفة سعودية تصدرعلى شبكة الانترنت

محاورة الأسبوع محاورة الأسبوع

هذه المحاورة بين الشاعرين الكبيرين مطلق بن حميّد الثبيتي رحمه الله وشليويح بن شلاح المطيري .
وقد جرت هذه المحاورة في عام 1404ه بالرياض.
مطلق:


على شليويح المطيري لزم نعلن بالجهاد
اللي ليا شاف المنيحه راغ من حلابها
ان كان ربع في ربيع اليوم يجمد في جماد
والغرفه اللي يدرق فيها قفلنا بابها

شليويح:


يا مطلق انته ما انت دايم مرتكي فوق الشداد
الخلب يارجال عند اللي يشد انصابها
مايجمد الا سمنك اللي كان جامد فالبراد
واليوم شبينا عليك النار يا شبابها

مطلق:


خيرك لحالك جيت غازي من بلاد اليا بلاد
وليا زهمتك قمت تمسح لحيتك واشنابها
ما تعرف ان الزرع يوم يطول تاليه الحصاد
وتشيله البدوان فالامداد جوف اعيابها

شليويح:


مافيه داعي للفزوع اللي يحبون العناد
أنا لحالي عارف الديره وأخاو أذيابها
لبست لك ثوبٍ جديد وقلت داخله البياد
والناس غيرك يالثبيتي قانعه بثيابها

مطلق:


يالشاعر اللي تزهب البندق وحركت الزناد
أنا ورى الطايف وجاني شرها وأسبابها
أحسبك تزرع بر ما تزرع سلم والا عراد
فالديره اللي كل ما مطرت تسيل أشعابها

شليويح:


ما كل يوم تشم بالذعذاع لك مسك وزباد
العز بايمان العيال وما تحوش أرقابها
اترك جناح الغتره اللي جوده شوك الكداد
جمهات رأسك سالمه واصل السهم ما صابها

مطلق:


الفارس اللي ينطح العدوان وسيوفه حداد
ماذل من سيارةٍ ما وصلت ركابها
أنا لوني فالعيون الحول ذريت الرماد
ترتاح منه ولا نذر الكحل فوق أهدابها

زهران عون الله المطيري/بريدة

 

 

[للاتصال بنا] [الإعلانات] [الاشتراكات] [الأرشيف] [الجزيرة]
توجه جميع المراسلات التحريرية والصحفية الى chief@al-jazirah.com عناية رئيس التحرير
توجه جميع المراسلات الفنية الى admin@al-jazirah.com عناية مدير وحدة الانترنت
Copyright, 1997 - 2002 Al-janirah Corporation. All rights reserved