يامن يبشرني عسى نجد ممطور
وان الرشا سيله تجمع ابرامه
واد الرمة سيله جرى كنه أبحور
ياخذ شهر سيله يزيد اقتحامه
ومبهل يجيه السيل دوراً بأثر دور
زودٍ على مجراه ركب العدامة
واد الجرير أيصير بالسيل مغمور
وأيضا يعم الخير شرقه وشامه
يضفي على كل الوطن مرتع الخور
من الشمال الى طوارف اتهامه
وبعده يجي للعشب نوار وزهور
وتلقى الزبيدي طلعٍ بالمحامه
وراع الدبش من كثرة الخير مسرور
كل على كيفه يوجه جهامه
دار الرجال اللي لهم بالبشر دور
وأيضا الملوك اللي تقود الزعامة
دار الرسالة والهدى منبع النور
فيها النبوة ثبتت للقيامة
مهبط وحي ما دارها كل مخمور
أقدس وطن فالأرض فيها علامة
فيها الحرم والبيت بالعدل معمور
كل يطوف وفوق عنقه احرامه
والبير زمزم فالأحاديث مذكور
وفيهاالخليل محرّزين مقامه
تُحكم بشرع الله عقيدة ودستور
وسنة نبيٍ ظللته الغمامة
